Longkazatta ura makhawok apamli
Mangarungki kaji rakhong khonkhuida,
Zingrot palongra chipemda zithuihao.
Langsot mapongma; aneng ngarakmang.
Shimanhaida mazat kasa Imanglali
Lukhamashanna Calvaryli thankai,
Ngashanda theingasak sokhami-ya ura
Chirmihai iwui rachang thaichamla
Iwui mirin Prohona machutmi.
Nawui Phaningkhami shanla makhuima!
Nali zanghaoda ara iwui mirin.
Lukhamashan sokhami mavat luima
I mirin pheikar mashungmida khangkami.
Kahor lungli yaothuida iwui mirin
Horngasaka zingthanlamwui kahor thada.
Proholi soching-lu, he I mangla!
Kongphei ’pamli lingsang kahai thingrong thada
Prohowui sokhami ’lungli kharing-bing
Khangahui mavaima; atheila matheida
Otsak kachida mataisang ngasak